Aron Jóhannsson atvinnumaður í knattspyrnu og kona hans Bryndís Stefánsdóttir hafa sett glæsilega útsýnisíbúð á 9. hæð í Kópavogi á sölu. Aron og Bryndís búa í Þýskalandi en Aron valdi á sínum tíma að leika með bandaríska landsliðinu í knattspyrnu í stað þess íslenska.
Opið eldhús með fallegri eyju er í íbúðinni og nýtur útsýnið sín afskaplega vel í stofu og borðstofu. Þau Aron og Bryndís eru með flottan og vandaðan smekk og má finna falleg og klassísk húsgögn í íbúðinni inn á milli sérsmíðaðra innréttinga eftir Björgvin Snæbjörnsson arkitekt.
Tvö svefnherbergi eru í íbúðinni. Barnaherbergið er fallegt og bleikt en Bryndís og Aron eiga tveggja ára gamla dóttur. Hjónaherberginu fylgir bæði fataherbergi og baðherbergi. Ásett verð er 94,9 milljónir.