Anna Margrét Jónsdóttir er búin að vera að gera upp húsið sitt á Túngötu 34 á undanförnum árum. Þau hjónin keyptu það fallega upp gert á sínum tíma, en hafa á síðustu árum lagt nokkuð mikla vinnu í að gera það að fullu. Þau hafa aldrei viljað umfjöllun um húsið í fjölmiðlum, en nú vilja þau passa upp á að það komist í réttar hendur. 

„Þegar ég keypti húsið á sínum tíma þá var það sem heillaði mig mest hvað fyrri eigendur höfðu haldið fallega í það sem var upprunalegt við húsið. 

Þau höfðu unnið með fagfólki í að laga upprunalegar rósettur. Þau fundu málverk á bak við skáp í anddyrinu og fluttu inn rautt gler sem var sett inn í rýmið sem passaði fullkomlega við upprunalegan lit á hurð hússins,“ segir Anna Margrét. 

Húsið er rúmlega 300 fm að stærð en að auki eru fermetrar í risi hússins sem ekki eru skráðir. Húsið var byggt árið 1926 og er nánast algjörlega endurnýjað að utan sem innan. Flest rými hússins eru með aukinni lofthæð. Allt parket í húsinu er gegnheilt plankaparket. 

Hver er ástæða þess að þið eruð að selja húsið?

„Það eru blendnar tilfinningar að selja þetta fallega hús, en annað barnið er að fara að heiman og það er eitthvað innra með mér sem kallar á áframhaldandi verkefni um að gera upp og breyta. 

Ég vona að húsið farið í hendurnar á aðila sem kann að meta uppruna þess. Fjölskyldan okkar er búin að eiga yndislegar stundir hér. Enda stendur húsið á einstökum stað í einum fallegasta hluta borgarinnar að mínu mati,“ segir hún. 

Sólveig Jónsdóttir innanhúsarkitekt vann með Önnu Margréti í að útfæra breytingar á miðhæðinni. Eldhúsið var gert upp að fullu. Eins var baðherbergið á aðalhæðinni endurgert í takt við annað í húsinu. 

Af fasteignavef mbl.is: Túngata 34