„Það eina sem við breyttum ekki var baðið“

Marta Magnúsdóttir og kærasti hennar, Gísli Laufdal Stafánsson, keyptu 129 fermetra íbúð með bílskúr í Hafnarfirði í september árið 2018. Parið flutti loksins inn ásamt dóttur sinni Hrafntinnu og labradorhundinum Bronco í janúar árið 2019 en þau tóku sér góðan tíma í að taka íbúðina í gegn.

Marta segir að þau Gísli hafi gert mestallt sjálf með góðri hjálp frá fjölskyldu sinni. Þar sem Gísli er á sjó annan hvern mánuð töfðust framkvæmdirnar aðeins. 

„Við tókum niður allt loft og settum innfellda lýsingu, nýtt parket og hurðir og nýja eldhúsinnrétingu og fataskápa. Það eina sem við breyttum ekki var baðið. Við tókum niður vegg á milli eldhúss og stofu til að opna rýmið og færðum þottahúsdyrnar úr eldhúsi inn á svefnherbergisgang til að fá stærra eldhús. Það var einnig lítil geymsla inn af forstofunni sem við breyttum í fataherbergi fyrir yfirhafnir,“ segir Marta um þær breytingar sem þau gerðu. 

Marta segir að breytingarnar hafi gert það að verkum að íbúðin stækkaði mjög mikið auk þess sem hún varð bjartari. Þau fengu mun stærra eldhús, gerðu eyju og flæðið varð betra í íbúðinni. 

Þau Marta og Gísli keyptu íbúðina með það í huga að breyta henni. 

„Okkur langaði að opna íbúðina og gera hana bjarta og sáum mikla möguleika. Hún er svo vel skipulögð þrátt fyrir að vera bara um 100 fermetrar að stærð. Það var alltaf planið að finna eldri eign og gera hana að okkar og fá að innrétta hana eftir okkar höfði.

Vildu hvorki svart né hvítt

Við keyptum eldhúsið okkar hjá HTH og erum mjög ánægð með það. Okkur langaði ekki í hvíta eða svarta innréttingu og við fundum frábæra innréttingu sem er dökkbrún. Við settum Mortex á eldhúsið sem er með sömu áferð og steinn en kostar margfalt minna. Fataskápana keyptum við svo alla í Ikea. Parket og hurðir keyptum við í Birgissyni.“  

Marta segist elska að sitja uppi í sófa og njóta þess að horfa kringum sig á hið fallega heimili sitt og hafa það notalegt. 

„Ég elska borðstofuborðið mitt frá NORR11. Svo þykir mér líka mjög vænt um hluti sem hafa tilfinningalegt gildi eins og málverk frá ömmu minni og afa og vasa frá ömmu minni sem er látin.

Vön framkvæmdum

Framkvæmdir taka alltaf lengri tíma en maður heldur. Við ætluðum ekki að gera svona margt í upphafi en svo vindur það upp á sig. Það tekur vel á að vera í framkvæmdum en maður er alltaf svo ánægður eftir á. Við gerðum einnig upp okkar fyrstu íbúð fyrir rétt rúmum þremur árum svo við erum orðin smá vön og margt sem við lærðum og gerðum betur í þessari framkvæmd. Eins og núna tæpu ári eftir að við fluttum inn erum við nýbúin að klára litlu hlutina sem maður nennir hreinlega ekki að gera þegar maður er fluttur inn.“

Það mætti segja að þau Marta og Gísli væru orðin nokkuð vön því að taka íbúðir í gegn og býr Marta yfir nokkrum góðum ráðum. 

„Þetta mun alltaf taka lengri tíma en maður gerir ráð fyrir og kosta meira. Við höfum núna gert þetta tvisvar og munum pottþétt gera þetta aftur seinna meir, en núna ætlum við að njóta í einhvern tíma hér. Maður uppsker eins og maður sáir og gleðin er mikil þegar verkinu lýkur,“ segir Marta ánægð með íbúðina. 

Fyrir neðan má sjá nokkrar myndir frá framkvæmdunum og áður en eldhúsinu var breytt.