Tinna Brá Baldvinsdóttir og Einar Örn Einarsson, eigendur hönnunarverslunarinnar Hríms, hafa sett sitt fallega hús við Stigahlíð á sölu. Hjónin ákváðu að fara hvort í sína áttina á dögunum og hafa því ekki not fyrir sameiginlegt húsnæði.
Húsið er 312 fm að stærð og var það byggt 1984.
Búið er að laga húsið mjög mikið en hæst ber eldhúsið, sem er í gráum og svörtum litum. Innréttingin er frá Eirvík og það eru Smeg-eldhústækin líka. Eyjan í eldhúsinu hefur að geyma eldavél og mjög gott vinnupláss en fyrir ofan eyjuna er háfur í loftinu sem er tekið niður. Heildarmynd eldhússins er falleg og er það opið inn í borðstofu.
Á sömu hæð er einstakur garðskáli með kamínu og notalegheitum.
Baðherbergin í húsinu eru einstaklega falleg en þar mætast bleikir og gráir tónar á heillandi hátt.
Eins og sést á myndunum er hver hlutur á sínum stað og allt gert til þess að fegurðin fái að njóta sín sem best.