Sigurður Atli Sigurðsson myndlistarmaður og Sóley Frostadóttir danshöfundur hafa sett fallega þriggja herbergja íbúð í Laugardalnum á sölu. Íbúðin er 94 fermetrar en ásett verð er 59 milljónir.
Íbúðin er með eikarparketi og upprunalegri eldhúsinnréttingu. Falleg myndlist er áberandi í öllum herbergjum, hvort sem um ræðir eldhús, baðherbergi eða stofu. Í stofunni er mörgum smærri verkum raðað á einn vegg svo saman mynda þau skemmtilega heild. Stærri verk fá líka að njóta sín á meira veggplássi.
Sigurður Atli hefur gert það gott sem myndlistarmaður á undanförnum árum. Hann rekur Prent & vini og opnaði nýverið Y gallerí á gamalli Olís bensínstöð í Hamraborg. Hann hefur einnig verið einn af sýningarstjórum árlegrar jólasýningar í Ásmundarsal. Sóley er danshöfundur og hefur meðal annars gefið út tímaritið Dunce sem fjallar um dans og gjörningalist.