Íslenska arkitektastofan Minarc, sem rekin er af Erlu Dögg Ingjaldsdóttur og Tryggva Þorsteinssyni, fékk það verkefni að hressa upp á einbýlishús sem stendur í hæðum Hollywood í Los Angeles í Bandaríkjunum.
Húsið er sögufrægt en það var hannað af hinum heimsfræga arkitekt Richard Neutra, sem hannaði mörg af glæsilegustu húsunum í Suður-Kaliforníu. Þetta hús stendur á einstökum stað með útsýni yfir Nichols Canyon en Neutra sérvaldi lóðina með þetta hús í huga og er það eitt af fyrstu húsunum sem hann teiknaði á þessu svæði. Risastórir gluggar, flöt þök og fallegar verandir eru einkennandi fyrir hans hönnun. Húsið hafði þó farið í gegnum alls konar ferli síðan það var byggt og var lítið eftir af sjarma hönnunar Neutra þegar eigandi hússins festi kaup á því fyrir nokkrum árum.
Þetta hús var hannað í kringum 1940 og lögðu Erla Dögg og Tryggvi ofuráherslu á að koma húsinu í nútímalegt horf. Erla Dögg segir að húsið hafi gengið í gegnum mjög miklar breytingar í gegnum tíðina og þegar þau tóku við verkefninu var búið að bæta annarri hæð ofan á húsið. Það var því lítið eftir að upprunalegum sjarma og var búið að hlaða á húsið Hawaiian Tiki Tiki hönnun eins og Erla Dögg kallar það.
Erla Dögg og Tryggvi eru þekkt fyrir sína stílhreinu hönnun og þegar þau voru búin að fara höndum um húsið var það eins og nýtt.
Á neðri hæðinni liggja eldhús og stofa saman í sameiginlegu rými og það sem gerir húsið einstaklega sjarmerandi er heill gluggaveggur sem gengur þvert yfir stofuna. Hægt er að opna húsið upp á gátt þannig að innisvæði og útisvæði verða að einu. Garðurinn í kringum húsið er einstakur. Fyrir utan útisundlaugina sem er í garðinum þá er garðurinn svo gróinn að hann er eins og einkagarður.
Eldhúsinnréttingin er frá ítalska gæðamerkinu Boffi. Eldhúsið samanstendur af stórum skápavegg sem er úr bæsaðri eik og eyju sem hefur að geyma stórt helluborð og vask. Gróf viðarborðplata prýðir eyjuna en hægt er að sitja við hana og nota sem eldhúsborð.
Þegar Erla Dögg er spurð hvað hafi verið skemmtilegast við þetta verkefni segir hún að það hafi verið kúnnarnir eða eigendur hússins. Hún nefnir sérstaklega að þau hafi einstakan smekk og því hafi samstarfið við þau verið ánægjulegt.
Þegar Tryggvi er spurður að því hvað þau hjónin séu ánægðust með í húsinu nefna þau flæðið í húsinu. „Það er listin að láta innisvæði og útisvæði renna saman í eitt. Þetta er hús listarinnar og geymir ofsalega fallega list og einstök húsgögn,“ segir hann.
Þegar Erla Dögg og Tryggvi eru spurð hver hafi verið mesta áskorunin í þessu verkefni segja þau að það hafi verið að auka flæðið í húsinu og gera allt einfaldara. Þau eru á fullu í alls konar spennandi verkefnum þessa dagana og þegar ég spyr þau um hvað fólk vilji helst núna þegar kemur að heimilum nefna þau heimaskrifstofu, liti, list og líf.