Stiginn upp í íbúðina er sögufrægur. Hann endurspeglar þó ekki stemninguna sem ríkti í íbúðinni sjálfri.

Munaðarlaus 12 ára stúlka

Gabrielle Chanel, eða Coco eins og hún var kölluð, átti skjól á þessum stað og þangað var ekki hverjum sem er boðið. Hún fæddist 1888, lifði í 88 ár og kvaddi í janúar 1971. Það sem vekur athygli er að hún giftist aldrei og eignaðist ekki afkvæmi. Hún naut þó heilmikillar karlhylli og var eftirsótt hjá vel tengdum og ríkum mönnum. Það eru líklega ótal ástæður fyrir því að ekkert ástarsamband endaði með hjónabandi, en ætli stærsta ástæðan sé ekki sú að hún missti móður sína 12 ára gömul. Það markaði tímamót. Í stað þess að alast upp hjá ekklinum föður sínum gafst hann upp og sendi hana á heimili fyrir munaðarlaus börn. Þar átti hún dapurlega æsku. Það er ekki ósennilegt að þessi ár hafi mótað hana og gert það að verkum að hún gerði hlutina á sinn hátt, ekki eftir uppskrift annarra.

31 rue Cambon

Á 31 rue Cambon réð Chanel ríkjum og hagaði sér eins og hana sjálfa lysti. Innismókurinn var ekki búinn að skila skömminni og til þess að íbúðin ilmaði ekki eins og gamall öskubakki úðaði hún Chanel N°5 yfir viðarkubbana sem hún brenndi í arninum. Þetta var náttúrulega fyrir tíma ilmkertanna en í dag er þess gætt að ilmurinn af þessu þekktasta ilmvatni heims finnist vel þegar stigið er inn í íbúðina.

Þótt Chanel ætti þessa glæsilegu íbúð á besta stað í París þá gisti hún á Ritz-hótelinu í 34 ár. Íbúðin var því eins konar griðastaður þar sem hún hlóð batteríin, tók á móti fólki og lét hugann reika. Las bækur og hugsaði.

Sótti innblástur til Kína

Veggir forstofunnar eru klæddir með kínverskum viðarplötum sem eru skreyttar með drekum og táknum sem oft hefur mátt sjá bregða fyrir í hönnun Chanel. Hún var hrifin af munum frá Kína og sjást þeir víða í íbúðinni. Í forstofunni er hvíti stóllinn sem sem Chanel var mynduð í 1937. Um er að ræða antik-stól með hvítu satín-áklæði. Eftir myndatökuna hvarf stóllinn og enginn hafði hugmynd um hvað hefði orðið af honum.

Það var svo ekki fyrr en á níunda áratugnum að Karl Lagerfeld heitinn, einn helsti hönnuður Chanel í gegnum árin, fann stólinn á uppboði á Monte Carlo og þá var honum komið fyrir í anddyri íbúðarinnar. Síðan þá hefur stóllinn verði notaður í auglýsingar fyrir Chanel og þykir hann kalla fram stemningu liðins tíma.

Allt af öllu

Hlutir úr ólíkum áttum búa til heillandi heim. Chanel hafði mikinn áhuga á Kína þótt hún hefði aldrei komið þangað og sótti í hluti þaðan eins og kínversku klæðningarnar á veggjunum segja til um. Hún dýrkaði líka Feneyjar á Ítalíu eftir að hafa ferðast þangað í fyrsta skipti 1920 og svo kunni hún að meta verk frá Grikklandi til forna og Egyptalandi.

Í íbúðinni má sjá risastórar bergkristalsljósakrónur og barokkspegla sem fara vel við stórt og ríkulegt bókasafn Chanel. Í aðalstofunni er stór ljósgulur flauelssófi sem Chanel naut þess að liggja í og lesa. Það fór vel um hana í sófanum því sófinn er extra djúpur. Bækurnar í hillunum á bak við sófann eru af ýmsum toga. Það er óvenjulegt að sjá grunnar bókahillur á bak við sófa en þannig vildi hún hafa heima hjá sér. Í miðju bókaveggsins eru aðeins lægri hillur og þar fyrir ofan er stór spegill í ramma. Sá spegill er í takt við aðra spegla í íbúðinni sem komið er fyrir á mismunandi stöðum til að búa til meiri dýpt. Fyrir gluggunum eru ljósar þykkar gardínur en þegar þær eru dregnar frá er hægt að opna stóra glugga upp á gátt. Á milli glugganna er stór spegill og fyrir framan hann borð og lampi ásamt skrautmunum. Í stofunni eru einnig nokkur borð sem eru þakin af smáhlutum sem gaman er að skoða. Í stofunni eru líka kínversk skilrúm sem eru í stíl við veggklæðningar sem eru í öðrum herbergjum.

Við hliðina á aðalstofunni á hægri hönd er önnur stofa. Hún er með svipuðum klæðningum og forstofan og þar er einnig arinn, stór bókahilla og ljónastytta sem oft sést í einhverri mynd í hönnun Chanel. Veggirnir eru listaverk og því þarf ekki mikið magn af húsgögnum til að fylla út í rýmið. Hvítur þriggja sæta antík-sófi prýðir þessa stofu og þar er einnig stór kristalsljósakróna en saman býr þetta til sterka og notalega heild.

Í íbúðinni er borðstofa með borðstofuborði í miðju herbergi. Þar geta sex manneskjur setið til borðs. Þótt Chanel fengi gesti var hún ekki hrifin af of stórum boðum og vildi geta einbeitt sér að gestunum. Þetta með að koma svona fáum fyrir við borðið var útpælt. Í borstofunni fá gulir veggir að njóta sín. Fyrir utan kristalsljósakrónu sem hangir í miðju herbergi eru stóru útskornu speglarnir í gullrömmunum sem setja mestan svip á borðstofuna. Fyrir neðan þau eru stór borð með marmaraplötu. Í miðjunni fyrir ofan arininn er svo myndarleg stytta sem hrífur fólk með sér.

Gestalistinn á 31 rue Cambon var fjölbreyttur en vinir Coco Chanel voru allt frá Salvador Dalí yfir í Elizabeth Taylor. Íbúðin er þrungin af minningum, sögu og menningu sem sjaldséð er hérlendis. Það er kannski þess vegna sem heimsókn í þessa íbúð var jafnmikil upplifun og hún var.