Sigríður Björk Guðjónsdóttir ríkislögreglustjóri og eiginmaður hennar, presturinn Skúli Ólafsson, hafa fest kaup á útsýnisíbúð. Lesendur Smartlands þekkja íbúðina vel en fjallað var um hana á dögunum þegar hún fór á sölu.
Íbúðin er við Bergstaðastræti í 101 Reykjavík og er einstök á margan hátt. Hún er á efstu hæð og rúsínan í pylsuendanum er án efa um 38 fm svalir sem státa af einstöku útsýni. Meðfram svölunum er þykkt glerhandrið og því ágætt skjól á góðviðrisdögum. Af svölunum er útsýni yfir Þingholtin, flugvöllinn og Háskóla Íslands.
Það ætti því ekki að fara illa um hjónin og afkvæmi þeirra í íbúðinni.