Anna Svava Knútsdóttir og Gylfi Þór Valdimarsson hafa sett glæsilegt einbýlishús sitt í Norðurmýrinni á sölu. Hjónin reka ísbúðina Valdísi en auk þess er Anna Svava leikkona sem hefur skemmt fólki í fjölda ólíkra hlutverka í gegnum tíðina. 

Um er að ræða 304 fm hús sem byggt var 1940. Húsið sjálft var teiknað af Sigurði Guðmundssyni 1939.

Heimili Önnu Svövu og Gylfa er einstaklega smekklega innréttað, bæði innandyra og svo er garðurinn einstakur en þar er eð finna góða útiaðstöðu, heitan pott og ævintýrakofa. 

Eldhús og stofa eru sambyggð og blá eldhúsinnrétting spilar þar stórt hlutverk. Hún er með marmaraborðplötum og risastórri gaseldavél. Endaveggurinn er flísalagður upp í loft sem kemur einstaklega vel út. Á gólfinu er fiskibeinaparket með hvítum gólflistum. Úr eldhúsinu er búið að setja stóra glugga og svalir þannig að hægt er að ganga út í garð. Við eldhúsborðið eru brúnbleikar sjöur eftir Arne Jacobsen sem tóna vel við bláa innréttinguna. 

Í stofunni eru skemmtilegar hillur á veggnum í kringum sjónvarpið og þægilegur leðursófi ásamt hægindastólnum frá Eames. 

Stiginn upp á efri hæðina er teppalagður og en á efri hæðinni er að finna svefnherbergi og baðherbergi. 

Þetta einstaka glæsihús er nú komið á sölu. 

Af fasteignavef mbl.is: Hrefnugata 9