Við Tryggvagötu í Reykjavík er að finna fallega 92 fm íbúð í fjölbýlishúsi sem byggt var árið 1936. Mikil lofthæð og hráir veggir setja skemmtilegan karakter á íbúðina sem hefur verið fallega innréttuð í iðnaðarstíl. 

Mjúkir tónar eru einkennandi í íbúðinni í bland við málm sem gefur íbúðinni hrátt yfirbragð, en eignin er mikið opin og skemmtilega upp sett. Stórum glugga hefur verið komið fyrir milli stofu og svefnherbergis sem skilur rýmin að, en hráar steyptar súlur ramma gluggann inn og ljá rýminu einstakan sjarma. 

Eldhúsinnréttingin er ílöng með dökkbrúnum framhliðum og fallegri borðplötu. Rúnuð form og mjúkir litir eru áberandi í stofu og borðstofu þar sem fallegir húsmunir fá að njóta sín. 

Svefnherbergið er rúmgott, en glugginn til móts við rúmið gefur rýminu afar notalega stemningu. Þá hefur þremur pappaljósum verið komið fyrir í mismikilli hæð til að gefa rýminu mýkt og hlýju.  

Af fasteignavef mbl.is: Tryggvagata 16