Leikarinn Björgvin Franz Gíslason og eiginkona hans, Berglind Ólafsdóttir hjónabands- og fjölskylduþerapisti, hafa sett íbúð sína við Daggarvelli í Hafnarfirði á sölu.
Eignin sem um ræðir er 109 fm að stærð með sér inngangi, en hún er staðsett á þriðju og efstu hæð í snyrtilegu fjölbýlishúsi sem reist var árið 2004.
Íbúðin er björt og vel skipulögð, en stórir gluggar prýða rýmin og hleypa mikilli birtu inn. Stofa og borðstofa eru samliggjandi í björtu alrými, en þaðan er útgengt á sannkallaðar draumasvalir, en þær eru bæði sólríkar og rúmgóðar.
Eignin státar af þremur svefnherbergjum og einu baðherbergi, þar af er rúmgott hjónaherbergi með góðum skápum. Á lóðinni við húsið er svo stór og afgirtur sameiginlegur garður með leiktækjum.