Umhverfisvæna jólatýpan

Ert þú þessi umhverfivæna jólatýpa? Ef svo er þá er bara eitt í stöðunni og það er að reyna að endurnýta eins og hægt er. Til þess að vera sérlega umhverfisvænn má alveg endilega pakka jólagjöfunum inn í Morgunblaðið. Það er að segja ef þú ert ennþá á þeim stað að gefa jólagjafir.

Þykktin á pappírnum hentar vel en það þarf bara að passa að líma pakkann vel saman þegar pakkað er inn. Glært hefðbundið límband smellpassar inn í þennan gjörning.

Þegar búið er að pakka pakkanum inn í Morgunblaðið er fallegt að setja slaufu utan um pakkann. Ef þú átt ekki safn af gömlum borðum sem þú getur endurnýtt þá fást ódýrir og góðir borðar í Söstrene Grene. Þessi þykki svarti smellpassar svona líka fínt við pappírinn sjálfan.