Þórey Vilhjálmsdóttir Proppe, Salka Sigmarsdóttir, Birna Bragadóttir, Brynhildur Ólafsdóttir, Soffía Sigurgeirsdóttir og Sigþrúður Ármann létu sig ekki vanta þegar forsetafrúin, Eliza Reid, bauð í bókateiti til að fagna útkomu bókar sinnar Sprakkar. Þær eiga það sameiginlegt að hafa allar látið drauma sína rætast í lífinu og verið til fyrirmyndar, hver á sínu sviði.
Bókina skrifaði Eliza í veirufaraldrinum þegar rólegra var að gera hjá henni í leik og starfi. Í bókinni ræðir hún við venjulegar konur og hugmyndir þeirra um lífið og tilveruna. Hún segir að jafnrétti hafi hvergi mælst meira en hér á Íslandi og veltir því fyrir sér hvort Ísland sé fyrirheitna landið fyrir allar konur.
„Sprakkar merkir „kvenskörungar“. Í bókinni fjallar Eliza Reid um margvísleg mál sem snúa að lífi og störfum kvenna á Íslandi. Hún ræðir við konur á ólíkum sviðum þjóðlífsins. Þær hafa frá mörgu að segja og koma víða við í spjalli um stöðu kynjanna, atvinnulífið, móðurhlutverkið og ótalmargt fleira. Brugðið er upp litríkri mynd af íslensku nútímasamfélagi, kostum þess og göllum, og rýnt í það sem enn er óunnið í jafnréttismálum.
Eliza Reid er annar stofnenda ritlistarbúðanna Iceland Writers Retreat. Hún hefur unnið við blaðamennsku, ritstjórn og ritstörf og varð árið 2016 forsetafrú. Hér fjallar hún um þá stöðu sína, segir frá sjálfri sér og lýsir fjölbreyttum aðstæðum sem hún hefur lent í sem innflytjandi, kona og maki. Hún fléttar þeim sögum saman við frásagnir viðmælenda sinna og rifjar auk þess upp sögur af kvenskörungum fyrri tíma,“ segir á bókakápunni.