Fyrrverandi ráðherrann, Guðni Ágústsson, lét sig ekki vanta í útgáfuhóf hjá séra Hjálmari Jónssyni á dögunum.
Guðni fékk áritaða bók hjá Hjálmari, og hélt einnig glimrandi ræðu um leið og hann minnti á að hann lúrði líka á bók sem kæmi út á næstunni.
Hjálmar lét af störfum sem prestur í Dómkirkjunni fyrir fimm árum. Hann hefur þó ekki setið auðum höndum undanfarin ár og gaf á dögunum út bókina Stundum verða stökur til. Í bókinni er að finna sögur, vísur og ljóð sem sprottin eru af atburðum liðinna ára. Bókaútgáfan Hólar gefur út bókina.
Auk þess að starfa sem prestur sat Hjálmar á Alþingi fyrir Sjálfstæðisflokkinn í norðvesturkjördæmi. Margir félagar hans frá þingárunum, samherjar jafnt sem andstæðingar í pólitíkinni, mættu í teitið.