Vera Design fagnaði tíu ára afmæli með glæsilegri veislu í Gamla bíó á dögunum. Gestir skemmtu sér ákaflega vel í afmælisveislunni og fögnuðu því að á undanförnum tíu árum hefur fyrirtækið vaxið og dafnað.
„Vera Design var stofnað fyrir tíu árum síðan en þá eignaðist ég réttinn á allri hönnun Guðbjarts heitins Þorleifssonar en hann byrjaði að læra gullsmiðinn aðeins 16 ára gamall og starfaði sem slíkur allt fram á síðasta dag og skilur eftir sig merka gripi um allan heim. Hann kenndi mér margt gott sem ég hef tileinkað mér allri í hönnun minni frá upphafi og eru allir gripirnir okkar unisex,“ segir Íris.
Nú hefur Inga Dóra A. Gunnarsdóttir gengið til liðs við Vera Design og kemur hún inn sem meðeigandi og framkvæmdastjóri en hún hefur áralanga reynslu af skartgripabransanum sem hún hefur unnið við síðastliðin 14 ár. Íris segir framtíðina bjarta og ætlar fyrirtækið sér á erlendan markað með tíð og tíma en í dag er hönnunin seld í yfir 20 verslunum víðsvegar um landið. Í tilefni af þessum tímamótum hannaði Íris viðhafnarútgáfu af Infinity armbandinu sem er eftir Guðbjart heitinn.