Þótt margir hugsi um skemmtistaði eða stefnumótaforrit sem vænlega staði til þess að hitta tilvonandi maka sýna kannanir að fólk kynnist mökum sínum á ótrúlegustu stöðum. Marie Claire greinir frá könnun sem HSBC-bankinn í Bretlandi gerði.
Í ljós kom að einn af hverjum 50 hittir tilvonandi maka sinn í flugvél. Einhleypt fólk ætti því að gera meira en að horfa á skjáinn fyrir framan sig á ferðalögum um háloftin og reyna að vingast við næsta mann.
Flugvélar eru sagðar frábær staður til þess að kynnast nýju fólki en þeir einhleypu eru ekki þeir einu sem mynda ný sambönd þar. Samkvæmt könnuninni mynduðu 16 prósent flugfarþega einhvers konar viðskiptasambönd í lofti og 14 prósent eignuðust góða vini í háloftunum.