Smartland Mörtu Maríu | Frægð | mbl | 18.3.2016 | 13:00 | Uppfært 22.1.2021 10:16

Forsetaframbjóðandi fundarstjóri í flottasta partíinu

Halla Tómasdóttir. Friðrik Tryggvason

Halla Tómasdóttir tilkynnti í gær að hún hefði tekið ákvörðun um að bjóða sig fram til forseta lýðveldisins Íslands. Meðal þess sem Halla leggur áherslu á er að Bessastaðir verði opnir og að þar verði staðið fyrir þjóðþingum um stóru málin. Það ætti að vera auðvelt fyrir Höllu því hún er einstaklega vel tengd inn í fjármálaheiminn en hún var meðal annars framkvæmdastjóri Viðskiptaráðs

Halla er aldeilis ekki óvön því að halda stórar veislur en hún var einmitt fundarstjóri í einni umtöluðustu veislu síðari tíma þegar „Baugsdagurinn“ var haldinn hátíðlegur árið 2007. Þeir sem voru viðstaddir þennan viðburð hafa haft orð á því að öll önnur teiti fölni í samanburðinum.

Baugsdagurinn var raunar þriggja daga veisla þar sem ekkert var til sparað. Meðal þeirra sem skemmtu gestum Baugs var söngkonan Tina Turner sem söng lagið „Simply the best“. Þá voru aðrar stórstjörnur fengnar til að gera upplifun gesta sem mesta. Félagarnir úr Little Britain komu að málum auk þess sem Jón Ásgeir reyndi fyrir sér í sérstakri grínútgáfu af X-factor þar sem hann söng fyrir Simon Cowell. Mikil umfjöllun varð um þessa veislu sem þótti einn hápunkta „góðærisins“ á Íslandi.