Filippía möndlaði dressið með Birgittu

Hljómsveitin Írafár hélt tvenna tónleika á laugardaginn var í Hörpu en hljómsveitin hefur ekki spilað saman í 12 ár. Birgitta Haukdal söngkona Írafárs segir að þetta hafi verið magnað augnablik. 

„Tilfinningin var ólýsanleg og ég er svo full af þakklæti fyrir það að hafa fengið tækifæri til að standa á þessu stórkostlega sviði með hljómsveitinni minni, vinum mínum og fyrir allt fólkið okkar sem kom og naut kvöldsins með okkur. Án þeirra værum við ekkert. Orkan í salnum var engu lík og ég fæ ennþá hamingjustraum og brosi út að eyrum að hugsa um þetta kvöld,“ segir hún í alsælu eftir tónleikana. 

Birgitta var glæsileg á sviðinu. Filippía Elísdóttir fatahönnuður hjálpaði henni að setja saman töfrandi dress.  

„Filippía möndlaði þetta með mér. Það var pantað héðan og þaðan úr heiminum og sniðið og saumað til. Hún er algjör gullmoli hún Filippía,“ segir Birgitta.