Raunveruleikaþáttastjarnan og snyrtivöruhönnuðurinn Kylie Jenner hefur landað sinni fyrstu Vogue-forsíðu. Hún prýðir forsíðu ástralska Vogue í september og er forsíðan ansi ólík forsíðu GQ, sem hún prýddi í sumar.
Viðtalið sem fylgir forsíðunni er áhugavert fyrir þær sakir að systir hennar, Kendall Jenner, tekur það. Þar ræða þær um móðurhlutverkið, snyrtivörufyrirtækið hennar og framtíðina.
„Ég held að líf mitt hafi ekki breyst síðan ég varð móðir. Ég held frekar að sýn mín á lífið hafi breyst. Ég hugsa meira um framtíðina. Ég lifði einn dag í einu en nú lít ég meira til framtíðarinnar. Ég held reyndar að ég elski sjálfa mig meira eftir að ég átti Stormi. Og ég held ég reyni, ég meina ég er nú þegar jákvæð manneskja, bara að hafa gaman og vera jákvæð,“ segir Kylie.
Kylie segist hafa lært mikið af móður þeirra, Kris Jenner, um viðskiptaheiminn og eigi eftir að læra margt. Kylie stofnaði snyrtivörufyrirtækið Kylie Cosmetics árið 2015 og hefur haft mikinn hagnað af fyrirtækinu. Viðskiptatímaritið Forbes mat það svo fyrr í sumar að Kylie stefni í að verða yngsti sjálfgerði milljónamæringur í heimi á næstu mánuðum, en auðæfi hennar eru metin á 900 milljónir Bandaríkjadala.