Ellý Ármannsdóttir er nýjasti gesturinn í podcasti Sölva Tryggvasonar. Ellý byrjaði ung að starfa sem þula á Ríkissjónvarpinu, þar sem hún var kvöld eftir kvöld fyrir augum allra landsmanna. Síðan þá hefur hún gert ótal hluti, allt frá fréttaskrifum, yfir í að spá fyrir fólki og kenna hóptíma í líkamsrækt. Í viðtalinu við Sölva segir Ellý frá alls kyns hlutum, eins og því hvers vegna hún byrjaði að vinna í sjónvarpi.

„Ég skal segja þér af hverju ég sótti um að verða þula. Ég þekkti pabba minn lítið og hann var lítið í sambandi við mig og mig langaði að fanga athygli hans og ég vissi að hann horfði á fréttir og ég vissi að þulan kynnti fréttirnar. Þess vegna fór ég í fjölmiðla Sölvi!“

Ellý segir að sambandið við föður hennar hafi verið lítið sem ekkert og að drifkrafturinn hafi komið þaðan.

„Ég er svona til hliðar, svokallaður bastarður, sem er kannski neikvætt orð fyrir suma, en það er allt í lagi, þannig er líf mitt. Mig langaði svo að við pabbi værum í sambandi og ég vissi að öll þjóðin væri að horfa á RÚV á þessum tíma og hann hlyti að sjá mig, eða vinir hans eða einhver.“

Ellý vakti strax athygli fyrir að vera óhefðbundin á tímum þar sem allt var mjög kassalagað í fjölmiðlum. Hún segist ekki hafa tekið það inn á sig þó að margir hafi hneykslast á henni.

„Ég var tilbúin að vera alveg sama, þeim sem var ekki sama voru vinkonur mínar og mamma, sem býr í útlöndum. Það var mikið hringt í RÚV og kvartað, sérstaklega þegar ég var að blogga svona ljósbláar sögur á mbl.is. Þar skrifaði ég ímyndaðar sögur og fantasíur og ég held að um 10 þúsund manns hafi smellt á þessar sögur á hverjum degi og þá var ég tekin á skrifstofuna á RÚV. Yndislegt fólk, sem gaf mér valkost og ég sagðist bara vera hætt og allir voru glaðir og allt í góðu.“

Í viðtalinu ræða Sölvi og Ellý um ferilinn í fjölmiðlum, listir, spádóma og margt margt fleira. Viðtalið í heild má sjá hér að neðan.

Tengdar fréttir

Podcast með Sölva Tryggva

„Vildi ekki lifa lengur“

• Óttaðist stöðugt að vera að missa af einhverju
• „Ég var hættur að ná fullum svefni“
• Hætti að vera þverhaus sem þóttist vita allt
• „Fólk er hætt að nenna að tala illa um mig”

» Fleiri tengdar fréttir

• Blogga um frétt