Lesendur Smartlands hafa mikinn áhuga á fólki í lausagangi eins og komið hefur fram í lestrartölum vefsins. Það er því ekki úr vegi að dusta rykið af heitustu einhleypu konum landsins þessa dagana. Fólk í lausagangi kvartar töluvert yfir því að kórónuveiran hafi ekki sérlega jákvæð áhrif á stefnumótamarkaðinn en það þýðir ekkert að gefast upp og í árferði sem þessu þarf að finna nýjar leiðir í leit að framtíðarmakanum. Eitt er þó víst að það eru fjölmargar huggulegar konur á markaðnum eins og þessi listi gefur til kynna.
Berglind Pétursdóttir eða Berglind Festival eins og hún er kölluð. Berglind er mikill húmoristi og mjög sniðug eins og áhorendur þáttarins Vikan með Gísla Marteini þekkja. Berglind var gestur þáttarins Heimilislífs á dögunum og þar sást glögglega að hún er ekki bara skemmtileg heldur líka mjög smart með frábæran heimilissstíl.
Ásdís Rán Gunnarsdóttir er í lausagangi. Reyndar ekki í Reykjavík heldur í Búlgaríu þar sem hún býr og starfar. Ásdís Rán lætur ekkert í lífinu stoppa sig og heldur alltaf áfram, sama hvað.
Íris Björk Tanja Jónsdóttir skartgripahönnuður og eigandi Vera Design er á lausu. Íris er einstök smekkmanneskja sem hefur unun af því að gera upp íbúðir og húsnæði. Í kringum Írisi er alltaf allt upp á tíu og aldrei farin hálf leið í neinu.
Gyða Dan Johansen ofurskvísa er á lausu. Gyða er hrókur alls fagnaðar og elskar að lifa lífinu lifandi. Gyða þykir ein best klædda kona landsins og fer ótroðnar slóðir í skvísugangi.
Fegurðardrottningin og heilsumarkþjálfinn Linda Pétursdóttir er í lausagangi eftir að upp úr ástarsambandi hennar við Kanadamanninn slitnaði. Linda er ein af drottningum þessa lands en hún elur manninn á Álftanesi þar sem hún býr í fallegu húsi við sjóinn.
Ljósmyndarinn Saga Sig er á lausu eftir að upp úr sambandi hennar og Villa naglbíts slitnaði. Saga Sig er einn eftirsóttasti ljósmyndari landsins en hún tekur ekki bara fallegar myndir heldur málar hún líka áhrifarík málverk. Saga Sig er alltaf eins og klippt út úr Vogue og myndi aldrei láta sjá sig í krumpuðum jogginggalla.
Sara Oddsdóttir lögfræðingur og stríðsmaður ástarinnar er á lausu. Hún rekur vefinn Saraodds.is en þar er hægt að panta tíma í markþjálfun ef fólk vill auka lífsgæði sín.
Birgitta Líf Björnsdóttir er einn vinsælasti áhrifavaldur á Íslandi. Birgitta Líf er með háskólagráðu í lögfræði og viðskiptum og sinnir markaðsstörfum fyrir fjölskyldufyrirtækið World Class. Birgitta Líf sést oft með kampavín eða orkudrykkinn Nocco í hendi en þekkist líka á götum úti á Range Rover með einkanúmerinu BLB.
Katrín Amni er á lausu eftir að upp úr ástarsambandi hennar slitnaði. Katrín er hagfræðingur sem selur vítamínin Iceherbs. Hún hugsar vel um heilsuna og hefur upp á síðkastið verið eitt af andlitum Hreyfingar.