Forsetahjónin Guðni Th. Jóhannesson og Eliza Reid eru í opinberri heimsókn í Svíþjóð. Þau voru að sjálfsögðu búin að dressa sig upp þegar þau hittu konungshjónin Karl Gústaf og Silvíu í sænsku konungshöllinni.
Eliza gaf sænsku drottningunni ekkert eftir í glæsileika og klæddist fallegum vínrauðum kjól. Það er nokkuð ljóst að fatnaður Elizu var útpældur og lítur út fyrir að forsetafrúin hafi farið eftir ráðum sem fjallað var um í grein á Smartlandi rétt fyrir jól þar sem varað var við því að klæðast svörtum skóm við ljósar sokkabuxur.
Til þess að lengja leggina klæddist forsetafrúin húðlitum sokkabuxum og húðlitum skóm. „Varast ber að vera í svörtum skóm við hvíta sokka, nema það sé svört rönd á sokkunum sem tengist við skóna. Það lengir línurnar að vera í ljósum sokkum og ljósum skóm,“ segir í greininni.
Skilaboðin virðast ekki hafa náð til Svíadrottningar sem klæddist svörtum skóm við ljósar sokkabuxur.