Ferðast alltaf með kjól af ömmu

Áshildur Bragadóttir, fjármálastjóri Sahara, tekur síðkjól af ömmu sinni oftast með sér í ferðalög. Kjóllinn er hennar uppáhaldsflík. 

Hér er Áshildur í kjól af ömmu sinni.

Uppáhaldsflíkin mín er síðkjóll sem föðuramma mín átti og er frá áttunda áratugnum. Amma fylgdist alltaf vel með tískunni og ég hef erft þónokkuð af síðkjólum frá henni ásamt forláta pels sem ég held líka mikið upp á. Þessi síðkjóll fer með mér í flestallar ferðir sem ég fer til útlanda því einhverra hluta vegna finnst mér sjaldan tækifæri til að klæðast honum hérna heima. En svona dags daglega þá eru gallabuxur í algjöru uppáhaldi og við þær er ég yfirleitt í topp eða peysu, blaserjakka eða leðurjakka og hælum.“

Hvað dreymir þig um að eignast fyrir veturinn?

„Ég elska fallega skó og langar í flott stígvél fyrir veturinn. Svo er falleg þykk vetrarkápa í kamelbrúnum lit líka á óskalistanum, til dæmis frá Max Mara eða Massimo Dutti.“