Skærgrænn, já skærgrænn, neon-grænn, æpandi grænn, það er liturinn. Kardashian/Jenner-systurnar hafa verið duglegar að klæðast skærgrænum klæðum upp á síðkastið og að sjálfsögðu birta myndir af því.
Það má því draga þá ályktun að það sé aðalliturinn í ár. Skærgrænn getur hins vegar verið erfiður viðureignar, ef maður vill ekki líta út eins og yfirstrikunarpenni alla vega. Það getur verið upplífgandi á dimmum vetrarmorgni að klæða sig í eitthvað skært og skemmtilegt. Lykilatriðið er að byrja smátt, til dæmis á eyrnalokkum eða sokkum, og færa sig svo smátt og smátt áfram. Buxur með skærgrænni línu á hliðunum eru til dæmis tilvaldar á köldum febrúardegi. Ekki er síðra að nota snyrtivörur líka, eins og grænan augnskugga eða naglalakk þegar maður fer út á lífið.