66°Norður og danska kvenfatamerkið Ganni kynntu framhald á samstarfi fyrirtækjanna á tískuvikunni í Kaupmannahöfn í kvöld, fimmtudag, en fyrirtækin tóku fyrst höndum saman í ágúst í fyrra þegar ný sumarlína, sem kemur í verslanir núna í mars, var kynnt.
Samstarf fyrirtækjanna fyrir veturinn 2019 samanstendur af dúnúlpu, dúnvesti, kjól, trefli og tösku. Hönnunarteymi 66°Norður og Ganni unnu saman að línunni og var innblástur sóttur í vetrarlínu og sjófataarfleifð 66°Norður með skemmtilegum og ferskum blæ frá danska kvenfatamerkinu. Allar vörurnar í samstarfinu eru úr tæknilegum efnum og framleiddar af 66°Norður í takmörkuðu upplagi.
„Til að fylgja á eftir fyrri samstarfslínunni vildum við taka samstarfið áfram upp á næsta stig. Við unnum með snið sem voru til en vildum gefa þeim nýja nálgun. Ég kafaði ofan í gamlar vörulínur og myndasafn frá 66°Norður og við fengum meðal annars innblástur frá gömlum myndum af sjómönnum að störfum sem minnti mig á heimabæ minn Hirtshals og sjómannasamfélagið þar. Svuntan í línunni er í uppáhaldi hjá mér, en hún er byggð á fiskvinnslusvuntu sem 66°Norður framleiðir enn í dag. Hugmyndin með línunni var að sjóða saman borgarlíf og hugarheim Ganni við tæknilegan útivistarfatnað,“ Segir Ditte Reffstrup, listrænn stjórnandi Ganni.
Samstarfslína 66°Norður og Ganni fyrir veturinn 2019 er væntanleg í búðir í haust en fyrra samstarfið er væntanlegt núna í vor en verslanir á borð við Selfridges og Goodhood í London, Nordstrom í Bandaríkjunum og vefverslanirnar Net-a-Porter og MyTheresa munu selja línuna svo einhverjar séu nefndar. Línan verður einnig fáanleg í völdum verslunum 66°Norður og Ganni.
Ganni er orðið eitt stærsta sinnar tegundar í Danmörku. Vörur þeirra má finna í yfir 400 verslunum um allan heim og er merkið áberandi á samfélagsmiðlum en þar hefur m.a. Beyonce Knowles sést í kjól frá merkinu.