Svona lengir frú Beckham leggina

Victoria Beckham er búin að komast að því hvernig má auðveldlega láta sem útlimirnir séu lengri en þeir eru. Einhverjir myndu segja að hún væri einfaldlega í allt of stórum fötum en aðrir telja þetta frábært tískutrix. 

Victoria Beckham. mbl.is/AFP

Frú Beckham sýndi haust- og vetrarlínu sína um síðustu helgi og leit út fyrir að vera með ofurlanga útlimi í hönnun sinni. Svo er hins vegar ekki en hin fíngerða Beckham er bara um 163 sentimetrar á hæð. Útvíðar vel gyrtar svartar dragtarbuxur blekktu augað en þær náðu vel niður á gólf þó svo hún væri á hælum. 

Það er kannski kominn tími til að hætta að stytta buxur og bretta upp á ermar. Það sama gildir einnig um skyrtuna sem Beckham var í undir fallegri brúnni peysu úr nýrri línu. Hún þarf ekki vettlinga þar sem skyrtuermarnar voru allt of langar miðað við hefðbundnar hugmyndir um ermar. 

• Blogga um frétt