„Við höfum verið mjög heppin og erum þakklát fyrir þær hlýju móttökur á íslenska markaðnum sem við höfum fengið frá því að við opnuðum í síðustu viku. Viðbrögðin hafa verið einstaklega jákvæð, bæði hvað varðar rýmið sjálft og svo nýju línuna og við vonum að viðskiptavinir verði áfram ánægðir með þessa nýju verslun,“ segir Marie Honda, forstjóri COS, í viðtali við Smartland.

Fyrsta COS-verslunin leit dagsins ljós í Bretlandi 2007 en síðan þá hefur verslununum fjölgað um heim allan. Á Íslandi er verslunin tæpir 600 fm á tveimur hæðum. Honda segir að það sé spennandi að geta haldið útrásinni áfram.

„Við erum alltaf að leita að nýjum stöðum til að opna á og við veljum þá mjög vandlega. Þegar við fundum þetta húsnæði við Hafnartorg fannst okkur að passa einstaklega vel fyrir okkar fyrstu verslun á íslenskum markaði,“ segir hún.

Fatnaðurinn frá COS samanstendur af lykilflíkum í bland við klassísk snið með nýjum nálgunum og er bæði nútímalegur og tímalaus. Fyrirtækið hefur aldrei auglýst vörur sínar á hefðbundinn hátt. „Við teljum að kúnnar okkar vilji persónulegri nálgun,“ útskýrir Honda og bætir við: „Við sköpum og höldum uppi samtali við viðskiptavini okkar með því að deila fagurfræði okkar og hlutum sem veita okkur innblástur, bæði á vefnum okkar og á samfélagsmiðlum, auk þess að vera í samstarfi við listamenn og hönnuði og rafræna COS-tímaritið. Á þennan hátt getum við komið persónuleika okkar á framfæri með myndum, greinum, stöðum og viðtölum við fólk sem við teljum að passi við hugmyndafræði COS.“

COS hefur frá upphafi lagt mikinn metnað í stuðning við listalífið og hefur átt samvinnu við og stutt bæði þekkta sem og upprennandi listamenn, gallerí og skapandi vinnustofur. COS hefur meðal annars unnið að verkefnum með The Serpentine Gallery í London og Guggenheim í New York. „Okkur finnst listin vera á undan tískunni þannig að í stað þess að fylgja hefðbundnum tískubylgjum þá leitast hönnuðir okkar við að fá innblástur frá heimi listarinnar, hönnunar og arkitektúrs.

Þessi innblástur er upphafspunktur alls sem við sköpum hjá COS. Það er þess vegna eðlilegt fyrir okkur að styðja við það umhverfi sem veitir okkur þennan innblástur, hvort sem það er með samstarfsverkefnum eða bara að deila því á miðlunum okkar. Á síðasta áratug höfum við haft tækifæri til þess að vera í samstarfi við skapandi fólk af öllum geirum á mörgum stöðum, eins og til dæmis í Mílanó á Salone del Mobile, eða með því að styðja við söfn eins og The Serpentine Galleries og við lítum á þetta samstarf sem tækifæri til að gefa listamönnum eitthvað fyrir að hafa veitt okkur innblástur.“

Aðspurð hvort COS hyggi á samstarf við íslenska listamenn eða hönnuði segir hún að þau séu sífellt að leita að samstarfsfólki sem passar við fagurfræði þeirra. „Við erum spennt fyrir því að kynnast skapandi samfélagi Reykjavíkur. Náttúran á Íslandi veitir okkur líka innblástur, við mynduðum haust og vetrarlínunna okkar hér árið 2015!“

Vor- og sumarlína COS er innblásin af vatni og lofti. Líkt og þessi náttúruöfl þá eru útlínurnar síbreytilegar og flæðandi. Áferðin og eiginleikar efnanna eru aðalatriðin í hönnuninni. Og COS leggur mikið upp úr sjálfbærni.

„Við lítum svo á að fólki líki við hversu tímalaus hönnun okkar er í stað þess að fylgja nýjustu tískubylgjum sem þýðir að viðskiptavinir geti gengið í fatnaði okkar árum saman. Við hugsum vel út í hvaða efni við notum og endingu þeirra og hvetjum til endurnýtingar og viðgerða.

Frá því að við opnuðum árið 2007 hefur hugsjón okkar verið hin sama, að bjóða upp á hágæða fatnað á samkeppnishæfu og viðráðanlegu verði og sem er tímalaus, nútímalegur og praktískur. Við erum nú með verslanir í 41 landi og tökum þeim jákvæðu viðbrögðum sem við fáum frá viðskiptavinum með auðmýkt.“