Kemst upp með allt með sólgleraugu

Lovísa Tómasdóttir klæðskerameistari og förðunarfræðingur er með skemmtilegan og öðruvísi fatastíl. Hún hannar og saumar mikið af fötum sínum sjálf og segist elska að hoppa á milli fatastíla. Íslendingar kannast margir við föt úr smiðju Lovísu þar sem hún hannaði og saumaði búninga Daða og Gagnamagnsins í Söngvakeppninni auk þess sem hún sér um fataskáp Siggu Kling. 

„Ég byrjaði mjög ung að sauma og hafði mikinn áhuga á fötum en tískuvitið var ekkert. Ég bjó úti í sveit og eina tenging mín við tísku voru tónlistarmyndbönd sem voru sýnd á Skjá einum. Ástandið var því ekki gott,“ segir Lovísa um hvernig áhuginn á tísku og hönnun kviknaði.  

Hvernig er þinn fatastíll?  

„Ég er ekki föst í neinum fatastíl. Ég elska að hoppa á milli stíla. Ég heyri samt fólk kalla flíkur „Lollulegar“ og eru þær þá yfirleitt skrýtnar, með miklum pallíettum eða fjöðrum. Eða bleikar, ég elska bleikan. Ást mín á bleika litnum byrjaði þegar ég var tveggja ára og var Barbapabbi á öskudaginn #barbapabbi4life.“

Lovísa segist sækja innblástur í fólkið í kringum sig, listafólk, götutísku og gamlar tískubækur. Tíska frá áttunda og níunda áratug síðustu aldar er meðal annars í uppáhaldi hjá henni. 

„Ég elska 80's-tískuna. Hún er svo dásamlega fallega ljót. Allir litir settir saman og engar reglur! 70's-tískan er líka unaður. Blásíð hár, diskóbuxur og glamúrinn í hámarki.“  

Er einhver flík í uppáhaldi hjá þér?  

„Ég og samstarfskona mín Íris Sif fórum til Grikklands á síðasta ári og keyptum gamla feldi og leðurjakka sem hún selur uppi í stúdíói. Þar keypti ég myntugrænan leðurjakka með hvítum loðkraga. Hann er ótrúlega hallærislegur og ég elska hann.“ 

Bestu kaup sem þú hefur gert?  

„Ég keypti pung í Rokki og rómantík fyrir tveimur árum sem ég nota á hverjum degi. Hann er úr glansandi pleðri og mér finnst hann passa við öll „outfitin“ mín. Það kemst svo mikið í hann; veskið mitt, varalitur, kaffimál, spáspilin frá Siggu Kling sem ég að sjálfsögðu tek með mér út um allt og nóg af annarri vitleysu.“

Lovísa á gott safn af aukahlutum, skarti og sólgleraugum.

„Ég er mikið fyrir skartgripi. Þeir verða helst að vera stórir og áberandi. Það sem mig skortir í persónuleika bæti ég upp með stóru skarti.“ 

Af hverju öll þessi sólgleraugu?  

„Sólgleraugu gleðja mig. Ég geng með sólgleraugu um miðja nótt, niðri í bæ í nóvember og þykist vera aðalskvísan. Þau poppa upp öll „outfit“ og eru „photoshoot friendly“. Þau eru líka afar hentug daginn eftir djamm þegar maður er með bauga niður á nafla.“

Er mikill munur á því hvernig þú klæðir þig dagsdaglega og þegar þú ferð eitthvað fínna?

„Já. Ég elska að klæða mig upp svo ég nýti þau tækifæri sem ég er að fara eitthvað fínt. Aðra daga er ég kannski ekki búin að fara í sturtu né greiða á mér hárið í þrjá daga og fólk forðar börnunum sínum frá mér þegar á geng niður Laugaveginn.“

Lovísa klæðist ekki bara bleikum, hún á sér líka dekkri hlið og segist elska BDSM-tískuna sem Hatari kom af stað í fyrra.

„Vinkona mín og fyrrverandi yfirmaður, Anna Kristín Magnúsdóttir, opnaði Rokk og rómantík árið 2017 og ég var með henni í því ferli. Búðin er mjög gotharaleg, sexí og dökk, svo ég fór að klæðast meira í þeim stíl. Hatari kom svo auðvitað mikilli BDSM-tísku af stað hér á landi og ég dýrka það. Allir orðnir voða glansandi og sexí. Fleiri ólar, korselett og svipur takk!“

Þú raðar saman fötum á frumlegan hátt. Hugsarðu stundum: nei þetta passar ekki saman eða það er skrítið að fara í nærfatnað yfir rúllukragabol. Ertu með einhvern stoppara?

„Er ég með stoppara? Já, ég er með stoppara þegar kemur að fatnaði en ég vildi nú samt helst að hann væri ekki til staðar. Ég dáist að fólki sem lætur sig ekkert varða hvað öðru fólki finnst um það. Það er mitt markmið að öðlast þetta öryggi.“  

Spurð hvort íslenskar konur mættu vera duglegri að taka áhættu í fatavali segir Lovísa að konur megi klæða sig eins og þær vilja. Að því sögðu bendir hún á að það fylgi því mikið vald að þora að klæða sig öðruvísi. „Það eru þau sem þora sem gefa mér innblástur og vekja forvitni mína.“

Hvað er á óskalistanum?

„Mig langar í rauðan loðfeld. Stóran og síðan loðfeld. Ef ég finn hann ekki mun ég mögulega sauma hann sjálf. Getur einhver bent mér á hvar ég get fengið einn slíkan?“

Hægt að er fylgjast með Lovísu á instagramsíðu hennar en þar birtir hún myndir af því sem hún er að gera.