Melania Trump, forsetafrú Bandaríkjanna, klæddist svörtu frá toppi til táar í kappræðum eiginmanns síns, Donalds Trumps Bandaríkjaforseta, í vikunni. Hún var í svörtum ermalausum kjól, svörtum hælaskóm og með svarta grímu í stíl.
Trump-hjónin smituðust bæði af kórónuveirunni fyrir nokkrum vikum en hafa bæði náð sér af veikinni. Á meðan eiginmaður hennar lagðist inn og fékk lyf tók Melania náttúrulegri nálgun í baráttunni við veiruna og einblíndi á vítamín og lækningajurtir.
Kjóllinn sem frú Trump klæddist er frá Christian Dior. Hann er með stórum kraga og opnu v-hálsmáli. Hún var með þunnt svart belti um mittið. Við kjólinn var hún í háhæluðum skóm frá öðrum Christian, Christian Louboutin, sem hún er reglulega í.
Þegar hún var utandyra var hún venju samkvæmt með svört sólgleraugu. Þegar inn í salinn þar sem kappræðurnar fóru fram var komið skipti hún sólgleraugunum út fyrir svarta andlitsgrímu sem passaði vel við kjólinn.