Sprenging í sölu á laugardagsfötum

Vilhjálmur Svan Vilhjálmsson og Pétur Ívarsson.
Vilhjálmur Svan Vilhjálmsson og Pétur Ívarsson. mbl.is/Kristinn Magnússon

Pétur Ívarsson, verslunarstjóri í Boss í Kringlunni, og Vilhjálmur Svan Vilhjálmsson, verslunarstjóri í Herragarðinum, hafa klætt karla þessa lands síðustu áratugi. Þeir búa yfir mikilli reynslu þegar kemur að sniðum, efnum og herratísku almennt. Pétur játar að hann dýrkar druslujakka og Vilhjálmur vill helst alltaf vera glerfínn. 

Hvernig hefur herratískan breyst eftir að kórónuveiran bankaði upp á?

„Það má segja að þegar tímamót verða í þjóðfélaginu eins og þessi faraldur er þá breytist margt. Fólk fer að hugsa öðruvísi og þar af leiðandi að klæða sig öðruvísi. Margir fóru að vinna heima og þar af leiðandi að klæða sig öðruvísi en á vinnustaðnum. Við fundum að margir vildu ekki vera á náttfötunum á Zoom-fundunum og má segja að það hafi orðið sprenging í sölu á hversdagsklæðnaði,“ segir Vilhjálmur.

„Þegar höftin hafa horfið smátt og smátt vilja karlmenn fá sér eitthvað fallegt þegar farið er eitthvað út eða breyta um stíl í vinnunni. Það varð sprenging í sölu á joggingpeysum og buxum. Svo hafa strigaskór tekið fram úr spariskónum í sölu. Stóru merkin okkar, Hugo Boss, Polo, Ralph Lauren og Armani, hafa öll verið með nýjar áherslur og áhugavert að á tímum Covid voru hettupeysur og peysur með logo það sem viðskiptavinirnir vildu fá hjá okkur. Karlmenn vilja vera afslappaðri og „casual“ dagsdaglega en í leiðinni leggja mikinn metnað í fínu fötin þegar tækifæri gefst,“ segir Pétur.

Pétur og Vilhjálmur eru sammála um að síðustu misseri hafi orðið sprenging í sölu á laugardagsfötum eða hversdagsklæðnaði eins og þeir kalla það. Þeir segja að fyrir nokkrum árum hafi þeir aðallega selt skyrtur og bindi en nú sé margt að breytast.

„Að eiga vandaða strigaskó, flottar gallabuxur og joggingpeysu er klárlega það sem við sjáum gríðarlega aukningu í fyrir utan allt sem við erum þekktir fyrir sem er „formal“ klæðnaður,“ segir Vilhjálmur og Pétur játar að 2020 hafi alls ekki verið stórt söluár þegar kom að jakkafötum og skyrtum.

„Allar árshátíðir, brúðkaup og veislur voru blásnar af en um leið og það er að breytast núna hefur allt farið á fullt og við viðbúnir með gott úrval í verslunum okkar. Okkar sérstaða er auðvitað gríðarlegt úrval og því auðvitað ekki annað hægt en að fagna því hversu vel viðskiptavinir hafa tekið því sem við erum að gera í innkaupum með opnum örmum og við finnum að þeir eru ánægðir með það sem við erum að sýna þeim,“ segir Pétur.

Við ræðum meira um heimavinnu og áhrif hennar á fataval og tísku. Þeir vilja ekki meina að heimavinnan hafi haft mikil áhrif og í raun ekki breytt innkaupum á fatnaði ef heildin er skoðuð.

„Þegar höftin eru að fara eru menn þyrstir í að fá sér falleg jakkaföt eða stakan jakka en til viðbótar sjáum við að það er orðið svo langt síðan menn fóru í fínni fötin þannig að það má ætla að menn þurfi nú að fá sér ný jakkaföt eða jakka. Svo hafa margir breyst í vaxtarlaginu. Covid-kílóin ýmist hafa bæst á eða fokið af,“ segir Vilhjálmur og hlær.

Hvaða breytingu sjáið þið helst?

„Það er margt sem minnir á tímana eftir efnahagshrunið. Það er ívið meiri litagleði og menn þora aðeins að breyta af vananum og vera frjálslegri í klæðaburði. Það einhvern veginn virðist gerast að menn vilja lyfta upp andanum. Það hafa margir breytt og bætt heima við og að sjálfsögðu má ekki gleyma sjálfum sér,“ segir Pétur.

Þegar þeir eru spurðir út í vor- og sumartískuna segja þeir að það verði meira um afslappaðri snið á jökkum og skyrtum.

„Axlapúðarnir hafa horfið að mestu og áherslan er að vera í vel sniðnum fötum en ekki of þröngu. Ljósari litir í jökkum og bómullar- og hörblönduefni gefa frjálslegt og afslappað yfirbragð. Einnig sjáum við mikla aukningu í að menn vilji vandaðar og flottar gallabuxur þar sem þær eru viðurkenndur fatnaður nánast alls staðar,“ segir Vilhjálmur.

Félagarnir Pétur Ívarsson og Brynjar Viggósson.
Félagarnir Pétur Ívarsson og Brynjar Viggósson. Ljósmynd/Facebook

Finnst ykkur karlar farnir að leyfa sér meira þegar kemur að herratísku?

„Já, við finnum að menn kunna að meta gæðin. Sérsaumurinn í Herragarðinum er alltaf að verða vinsælli og ef þú kaupir þér vandað þá ertu að kaupa þér flottari vöru, hún endist betur og þú lítur auðvitað mun betur út. Fötin skapa nú einu sinni manninn. Svo er líka þessi blanda að eiga bæði vandaðan hversdagsklæðnað, gallabuxur og peysu og svo á hinn bóginn að eiga vandaðan sparifatnað sem hentar við mismunandi tækifæri,“ segir Vilhjálmur.

Hvað einkennir vel klæddan karlmann?

„Í fyrsta lagi þurfa menn að sjá vel um fötin sín og bera virðingu fyrir þeim. Að bursta skóna og strauja skyrtuna er grunnurinn. Svo er mikilvægt að vera ekki í sömu fötunum tvisvar í röð. Eins og að leggja áherslu á heimilið sitt og raða því fallega upp þurfa menn að leggja metnað á sama hátt með fötin sín,“ segir Pétur.

Hver eru mestu tískumistök sem karlar gera?

„Þau geta verið af mörgum toga. Að hneppa báðum tölum á tveggja tölu jakka fær okkur til að iða í skinninu. Karlmenn eiga það einnig til að vera í of síðum buxum og með of langar ermar. Síðan eruð það litlu hlutirnir. Að vera ekki með eldgamalt belti og í sokkum sem ekki passa við fötin. Annars eru íslenskir karlmenn upp til hópa frekar vel klæddir,“ segir Vilhjálmur.

Ef þið væruð að fara að ganga í hjónaband í sumar. Í hverju mynduð þið vera?

„Þar erum við ívið íhaldssamir. Maður vill ekki fela brúðkaupsmyndina eftir nokkur ár þegar fólk kemur í heimsókn og því eru falleg klassísk jakkaföt eða smóking við hæfi. Við giftum okkur til að mynda báðir í svörtum smóking,“ segir Pétur.

Þegar ég spyr þá fyrir hverju þeir eru veikastir þegar kemur að fatnaði játar Pétur að hann hafi mikið dálæti á þverröndóttum bolum og því sem hann kallar druslujökkum sem er auðvitað bara frjálslegur blazer. Á meðan Pétur vill vera í druslujökkum er Vilhjálmur sérstakur áhugmaður um dökkblá jakkaföt og jakka og falleg ítölsk efni sem hann býður upp á í sérsaumnum verða oftast fyrir valinu.

Hvað þurfa allir karlar að eiga í fataskápnum sínum í sumar?

„Fallegan stakan jakka, fínar gallabuxur og fallega strigaskó, það ætti að dekka sumarpartíin og vinnuklæðnaðinn. En menn þurfa að muna að eiga til skiptanna,“ segir Pétur.

Er fólk að eyða meiri peningum í föt núna en oft áður?

„Já, okkur finnst mikið af nýjum kúnnum sem vilja eiga vandaðri og þar með ívið dýrari vöru en þeir höfðu áður keypt. Það líka er gott að koma til okkar og fá ráð og leiðbeiningar um hvernig eigi að klæða sig við hvert tækifæri. því fylgir auðvitað fjárfesting í sjálfan sig,“ segir Vilhjálmur.

Í blálokin spyr ég þá um sínar helstu tískufyrirmyndir. Svarið er einfalt, þeir dýrka James Bond.

„Hann kann að klæða sig við hvert tækifæri og því er málið einfalt. Strákar horfið á allar Bond-myndirnar og komið svo í spjall,“ segja þeir nánast í kór.

Nánar um málið
í Morgunblaðinu
Áskrifendur:
Nánar um málið
í Morgunblaðinu
Áskrifendur:
Kauptu vikupassa

Lestu meira með vikupassa!

Fáðu þér vikupassa fyrir 1.990 kr. og þú færð aðgang að öllu efni úr blaði dagsins í dag og næstu 6 daga.

Kaupa vikupassa

Aðrar áskriftarleiðir »