ÍBV vann sannfærandi 3:0-heimasigur á föllnu liði Aftureldingar í lokaumferð Bestu deildar kvenna í fótbolta í Vestmannaeyjum í dag. Olga Sevcova gerði tvö mörk fyrir ÍBV og Ameera Hussen eitt mark.
ÍBV heldur sjötta sætinu með 29 stig, jafn mikið og Selfoss en með verri markatölu. Afturelding endar í níunda sætinu með 12 stig og er fallið niður um deild.
Mbl.is spáði Aftureldingu níunda sætinu fyrir mótið og hitti þar naglann á höfuðið.
„Við sáum spánna og ætluðum að gera betur. Ætluðum okkur miklu meira, ætluðum að halda okkur í þessari deild og vildum bara meira. Við höfðum alltaf trú á verkefninu, héldum áfram og fórum í alla leiki með því hugarfari að ætla að vinna en að fara niður er ekki skemmtilegt þannig að það eru mikil vonbrigði“ sagði Ísafold Þórhallsdóttir, liðsmaður Aftureldingar, í samtali við mbl.is eftir leik.
Eftir tímabilið var liðið með fjóra leiki unna og fjórtán tapaða. Aðspurð hvað liðið gæti tekið með sér frá sumrinu sagði Ísafold:
„Úrslitin hefðu mátt vera betri en við sýndum alltaf sterkan karakter og lærðum mikið af þessu. Þetta mun hundrað prósent hjálpa okkur í framtíðinni og við ætlum okkur bara að læra af þessu. Núna tekur bara við gott frí og lokahóf í kvöld“