Zlatan Ibrahimovic, framherji Manchester Untied, hefur sætt sig við að ferill hans á Old Trafford er á enda runninn eftir að hann sleit krossband í hné í leik gegn Anderlecht í Evrópudeildinni í síðustu viku.
Hann hefur hins vegar áréttað að hann ætlar sér að snúa aftur á fótboltavöllinn eins og fram kom á mbl.is í gær. Það er þó ljóst að Svíinn verður frá keppni fram á næsta ár.
Í frétt Daily Mirror um málið segir að hann vonist til þess að halda ferlinum áfram í bandarísku MLS-deildinni, þó hann viti að hann eigi ekki afturkvæmt í búning United.
Zlatan er markahæsti leikmaður United á tímabilinu með 28 mörk, en samningur hans við félagið rennur út í sumar. Hann hafði möguleika á að framlengja hann fyrr í vetur, en gerði það ekki vegna áhyggja um að United kæmist ekki í Meistaradeildina.