Enskir fjölmiðlar greina frá því í kvöld að Ryan Giggs, fyrrverandi leikmaður Manchester United, verði ráðinn þjálfari velska karlalandsliðsins í knattspyrnu á morgun.
Knattspyrnusamband Wales hefur boðað til fréttamannafundar á morgun þar sem Giggs verður kynntur til leiks en hann mun gera fjögurra ára samning.
Giggs leysir Chris Coleman af hólmi en hann sagði starfi sínu lausu í nóvember og er tekinn við B-deildarliði Sunderland.
Giggs, sem lék 64 landsleiki fyrir Wales, lagði skóna á hilluna 2016. Hann var aðstoðarmaður Louis van Gaal hjá Manchesterliðinu tvö tímabil og stýrði svo liðinu í nokkrar vikur eftir að Van Gaal var rekinn.