Daniel James, leikmaður Swansea City og velska landsliðsins í fótbolta, er að öllu óbreyttu á leið til Manchester United en einhver frestur verður á því að gengið verði frá félagaskiptunum.
Ástæðan er sú að faðir James lést í gær, 60 ára gamall. Andlát hans bar brátt að, að því er fram kemur í fjölmiðlum í dag, en Swansea City hefur staðfest andlát föður leikmannsins.
Fregnir bárust af því í vikunni að Manchester United hafi náð samkomulagi við James um að ganga í raðir félagsins en talið er að United greiði 15 milljónir fyrir leikmanninn, sem er 21 árs gamall og er mjög hæfileikaríkur. Hann hefur oft verið kallaður „velski Messi“.