Franski ökumaðurinn Anthoine Hubert lést eftir harðan árekstur í Formúlu 2-kappakstri í Belgíu í dag. Hubert var 22 ára gamall.
Keppni var nýhafin þegar Hubert og Argentínumaðurinn Juan Manuel Correa lentu í harkalegum árekstri. Samkvæmt frétt BBC var Hubert á rúmlega 270 km hraða þegar slysið varð.
Keppni var stöðvuð og Correa bjargað úr bíl sínum sem var á hvolfi. Síðar var tilkynnt að keppni yrði ekki haldið áfram vegna þess að Hubert hefði ekki lifað áreksturinn af.
Correa var fluttur á sjúkrahús í Liege og er ástand hans stöðugt.