Spænska knattspyrnufélagið Real Madríd keypti hinn 18 ára gamla Reinier frá Flamengo í Brasilíu í síðasta mánuði. Táningurinn skrifaði undir sex ára samning við Real, en hann var kynntur til félagsins á blaðamannafundi í dag.
Reinier er hæstánægður með að vera kominn til eins stærsta félags Evrópu og hann barðist við tilfinningarnar á blaðamannafundinum. „Það er draumur að spila fyrir Real Madríd. Þetta er draumur fyrir mig og fjölskylduna mína. Ég hef alltaf haldið með Real og ég er gríðarlega þakklátur,“ sagði hann, áður en tárin fóru að streyma.
„Ég er rosalega ánægður og þakklátur og ég vil þakka föður mínum sérstaklega. Hann er hetjan mín,“ sagði Brasilíumaðurinn ungi grátandi.
Framherjinn ungi byrjar að æfa og spila með varaliði Real. Reiner hefur skorað sex mörk í fjórtán leikjum fyrir Flamengo í efstu deild Brasilíu. Þá hefur hann leikið með yngri landsliðum þjóðarinnar og m.a. skorað fimm mörk í tíu leikjum með U17.