Knattspyrnumaðurinn Alfons Sampsted er á leið til norska úrvalsdeildarliðsins Bodø/Glimt eftir að félagið komst að samkomulagi við Norrköping í Svíþjóð um kaupverð á bakverðinum. Fótbolti.net greinir frá.
Leikmaðurinn og félagið eiga enn eftir að semja um kaup og kjör, en Alfons lék æfingaleiki með Bodø/Glimt í síðasta mánuði. Liðið hafnaði í öðru sæti norsku deildarinnar á síðustu leiktíð og mun því spila í undankeppni Evrópudeildarinnar í sumar.
Alfons lék með Breiðabliki áður en hann var keyptur til Norrköping árið 2017. Honum gekk illa að festa sig í sessi hjá Norrköping og var hann þrívegis lánaður í sænsku neðri deildirnar; tvisvar til Sylvia og einu sinni til Landskrona.
Hann var svo lánaður aftur til Breiðabliks seinni hluta síðasta sumars og skoraði eitt mark í átta deildarleikjum. Alfons lék sína fyrstu A-landsleiki gegn Kanada og El Salvador í Bandaríkjunum í síðasta mánuði.