Leikur Inter Mílanó og Ludogorets sem fram fer í Evrópudeildinni í fótbolta á fimmtudag verður væntanlega lokaður almenningi vegna kórónuveirunnar sem hefur herjað á norðurhluta Ítalíu síðustu daga.
Leik Inter og Sampdoria, sem átti að fara fram á heimavelli Inter í gær, var frestað vegna veirunnar. Skólum og fyrirtækjum í Mílanóborg hefur verið lokað, en almenningssamgöngur hafa gengið áfram.
Rúmlega 600 stuðningsmenn Ludogorets höfðu keypt miða á leikinn og voru væntanlegir frá Búlgaríu.
Næstkomandi sunnudag mætast Juventus og Inter í toppslag í Tórínó og munu forráðamenn ítölsku deildarkeppninnar funda um hvort hann verði einnig spilaður fyrir luktum dyrum.