Óttar Magnús Karlsson, knattspyrnumaður hjá Venezia í ítölsku B-deildinni, hefur skrifað undir lánssamning við ítalska C-deildar liðið Virtus Francavilla sem gildir til loka yfirstandandi keppnistímabils.
Óttar Magnús var allt síðasta ár á láni hjá Oakland Roots í bandarísku B-deildinni, þar sem hann fór á kostum og skoraði 19 mörk í 30 leikjum og varð með því markakóngur deildarinnar.
Hann gekk til liðs við Venezia frá Víkingi úr Reykjavík haustið 2020 og var fyrri hluta tímabilsins 2021/2022 að láni hjá Siena í ítölsku C-deildinni.
Nú mun hann aftur reyna fyrir sér í sömu deild. Virtus Francavilla er í 10. sæti C-riðils C-deildarinnar sem stendur.