Knattspyrnumaðurinn Sofyan Amrabat hefur beðið liðsfélaga sína og þjálfara hjá Fiorentina á Ítalíu afsökunar á hegðun sinni á lokadegi félagaskiptagluggans á þriðjudagskvöld.
Amrabat, sem sló í gegn á HM í Katar, var orðaður við Atlético Madrid og Barcelona í janúar. Síðarnefnda félagið lagði fram tilboð í miðjumanninn, sem var hafnað.
Amrabat var allt annað en sáttur við ákvörðun félagsins og neitaði að mæta á fyrstu æfingu liðsins í febrúar. Hann hefur nú beðið félagið afsökunar og mætt til æfinga á nýjan leik.
Var afsökunarbeiðni hans samþykkt og var Marokkóinn í leikmannahópi Fiorentina í bikarleik gegn Tórínó í gær. Byrjaði hann á bekknum en kom inn á sem varamaður í seinni hálfleik.