Ronaldo var ekki tilbúinn að stíga til hliðar

Roberto Martínez, þjálfari portúgalska karlalandsliðsins í knattspyrnu, hefur útskýrt af hverju hann ákvað að láta Cristiano Ronaldo halda áfram að bera fyrirliðabandið hjá liðinu.

Ronaldo verður 38 ára á árinu og hefur bæði leikið flesta landsleiki og skorað flest landsliðsmörk allra í knattspyrnusögunni karla megin. Martínez tók við stjórnartaumunum í janúar síðastliðnum.

„Á vissum tímapunkti fær maður tækifæri til þess að hitta manneskjuna á bak við knattspyrnumanninn og fyrir mér var það mjög skýrt augnablik.

Ég hitti alla leikmennina og maður sér hversu mikils virði það er fyrir þá að spila fótbolta og á hvaða stað þeir eru á ferli sínum. Cristiano var ekki reiðubúinn að stíga til hliðar.

Hann var klár í slaginn og vildi vera hluti af nýja verkefninu. Á þeim tímapunkti var það mjög auðveld ákvörðun að velja hann í mars-verkefnið og taka fótboltatengda ákvörðun út frá því,“ sagði Martínez í samtali við Talksport.

Roberto Martínez, landsliðsþjálfari Portúgals. AFP

„Í verkefninu skoraði hann fjögur mörk, var raunverulegur leiðtogi, fyrirliði og er nokkur sem býr yfir reynslu sem enginn annar gerir í heimsfótboltanum.

Hann er leikmaður sem getur náð 200 landsleikjum fyrir þjóð sína og er einhver sem þörf er á að nýta í búningsklefanum,“ bætti landsliðsþjálfarinn við.

• Blogga um frétt