Arnar og María sigruðu í víðavangshlaupi

Þau Arnar Pétursson úr ÍR og María Birkisdóttir úr FH komu fyrst í mark í árlegu Víðavangshlaupi ÍR sem ræst var í 104. sinn í hádeginu í dag.

663 hlauparar voru skráðir til leiks, þar af 589 í fimm kílómetra hlaup og 74 í 2,7 kílómetra skemmtiskokk, að því er fram kemur á vef ÍR.

Fimm kílómetra hlaupið er jafnframt meistaramót Íslands í fimm kílómetra götuhlaupi.

Arnar Pétursson úr ÍR bar sigur úr býtum í karlaflokki þriðja árið í röð og hljóp á tímanum 15:52. mbl.is/Árni Sæberg

Í karlaflokki kom Arnar Pétursson fyrstur í mark sem fyrr sagði og sigraði hlaupið þriðja árið í röð. Tími hans var 15:52 mínútur. Næstu fimm hlauparar í mark voru einnig úr ÍR, þeir Þórólfur Ingi Þórsson, sem sigraði í flokki 40-49 ára karla á 16:16 mínútum, Maxim Sauvageon á 16:25 mínútum, Vignir Már Lýðsson 16:31 mínútum, Vilhjálmur Þór Svansson á 16:42 mínútum og Hlynur Ólason á 17:02 mínútum.

Í kvennaflokki sigraði María Birkisdóttir úr FH á 18 mínútum, á hæla hennar kom Arndís Ýr Hafþórsdóttir úr Fjölni á 18:07 mínútum og ÍR-ingurinn Fríða Rún Þórðardóttir varð þriðja og sigraði jafnframt í aldursflokki 40-49 ára kvenna á 19:07 mínútum.

Sigurvegarar fengu farandbikara til varðveislu auk gjafabréfs frá Macron.

María Birkisdóttir úr FH og Arnar Pétursson úr ÍR. María sigraði í kvennaflokki og hljóp á 18 mínútum sléttum. Ljósmynd/ÍR

• Blogga um frétt