Atvinnukylfingurinn Ólafía Þórunn Kristinsdóttir lék á 68 höggum eða þremur höggum undir pari á öðrum hringnum á Lacoste Ladies Open de France-mótinu í golfi í Frakklandi í dag.
Mótið er hluti af Evrópumótaröðinni, þeirri næststerkustu í heimi. Ólafía fékk fimm fugla á hringum í dag, tvo skolla og lék 11 holur á parinu. Hún lék fyrsta hringinn á pari og er því samtals á þremur höggum undir pari og er örugg í gegnum niðurskurðinn.
Valdís Þóra Jónsdóttir er einnig á meðal keppenda á mótinu. Þegar þetta er skrifað er hún búin að spila 12 holur og hefur leikið þær á parinu. Valdísi gekk illa í gær en hún spilaði hringinn á sjö höggum yfir pari.