Einstakur golfviðburður fer fram í dag þegar bandarísku kylfingarnir Tiger Woods og Phil Mickelson mætast í einvígi í Las Vegas. Þar keppa stórstjörnurnar í holukeppni og fær sigurvegarinn rúmlega 1,1 milljarð ísl. kr. í sinn hlut.
Rétt um 100 manns fá tækifæri að fylgjast með mótinu á keppnisvellinum í Las Vegas. Ólafía Þórunn Kristinsdóttir atvinnukylfingur verður í þeim hópi að því er fram kemur á golf.is.
Ólafía Þórunn fékk boð að vera viðstödd í gegnum vinkonu sína Cheyenne Woods, sem er einnig atvinnukylfingur.
Cheyenne og Ólafía voru saman í háskólaliði Wake Forest á sínum tíma og eru því góðar vinkonur. Cheyenne er náfrænka Tiger Woods en faðir hennar og Tiger Woods eru bræður.
Cheyenne fékk miða frá frænda sínum á viðburðinn og bauð hún Ólafíu að taka þátt í ævintýrinu.