Valdís Þóra Jónsdóttir lék ágætlega á þriðja hring á opna Lacoste Ladies Open-mótinu í golfi í Frakklandi en mótið er hluti af LET-Evrópumótaröðinni, þeirri sterkustu hjá atvinnukylfingum í Evrópu í kvennaflokki.
Valdís lék á 70 höggum, einu höggi undir pari, og er á samanlagt tveimur höggum yfir pari eftir þrjá hringi. Valdís lék illa á fyrsta hring eða á 79 höggum en hún bætti upp fyrir það með stórgóðum hring í gær er hún lék á 66 höggum.
Hún fékk fjóra fugla í dag, einn skolla og einn tvöfaldan skolla. Valdís er í 19. sæti ásamt Madelene Sagström frá Svíþjóð. Nelly Korda frá Bandaríkjunum er í toppsætinu á ellefu höggum undir pari.