Atvinnukylfingurinn og Íslandsmeistarinn Guðmundur Ágúst Kristjánsson lék á 73 höggum, einu höggi yfir pari, á þriðja hring á RAM Cape Town Open-mótinu í Áskorendamótaröð Evrópu í Suður-Afríku í dag.
Guðmundur er samtals á einu höggi undir pari eftir þrjá hringi. Hann lék fyrsta hringinn á 76 höggum og átti svo stórgóðan hring í gær og lék á 66 höggum. Lokahringur mótsins verður leikinn á morgun.
Íslenski kylfingurinn er í 61. sæti ásamt nokkrum öðrum kylfingum. Daniel van Tonder frá Suður-Afríku er í toppsætinu á 14 höggum undir pari.