Íslandsmeistarinn Guðrún Brá Björgvinsdóttir fór naumlega í gegnum niðurskurðinn á Gant Ladies Open-mótinu í Finnlandi í dag. Mótið er hluti af Evrópumótaröðinni í golfi.
Guðrún hefur ekki átt sína bestu hringi á mótinu því hún er á níu höggum yfir pari eftir tvo hringi. Skorið er hinsvegar lágt á mótinu því aðeins tveir kylfingar léku á undir pari á fyrstu tveimur hringjunum.
Guðrún lék fyrri hringinn í gær á 77 höggum en bætti sig um þrjú högg og fór í gegnum niðurskurðinn. Ekki mátti það tæpara standa því hún var einu höggi frá því að falla úr leik.