Guðrún Brá Björgvinsdóttir, atvinnukylfingur úr Keili, komst í gegnum niðurskurðinn á Australian Women’s Classic-mótinu í golfi sem fer fram um þessar mundir í Ástralíu.
Guðrún Brá lék annan hring sinn í fyrrinótt á 78 höggum eftir að hafa leikið fyrsta hringinn á 73 höggum. Þegar hún hafði lokið öðrum hring áttu fjöldi kylfinga eftir að klára annan hring og þurfti Guðrún Brá því að bíða um stund eftir því að fá að vita hvort hún kæmist áfram.
Hún er í 59. til 66. sæti eftir tvo hringi, sjö höggum yfir pari, en 74 kylfingar komust í gegnum niðurskurðinn og munu leika þriðja hringinn.
Þriðji hringurinn verður leikinn seint í kvöld og í nótt.