„Við ætluðum ekki að leyfa áhorfendum að sjá annan svoleiðis leik," sagði Berta Rut Harðardóttir, leikmaður Hauka, eftir 25:21-sigur á Fram í næstsíðustu umferð Olísdeildarinnar í handbolta í kvöld. Fram vann 30:16-sigur er þau mættust í bikarúrslitum um síðustu helgi.
Ljóst var á fyrstu mínútu að Haukakonur ætluðu ekki að leyfa Fram að komast upp með annað eins í kvöld og léku þær finna fyrir sér í vörninni.
„Við vinnum þetta klárlega á vörninni. Við börðum vel á þeim og það gekk allt upp. Við notuðum úrslitaleikinn til að gera okkur klárar. Það var engin tilbúin í þann leik, en í dag sýndum við hvernig handbolta við getum spilað."
Berta segir viðbrögð Framkvenna við varnarleiknum hafa gefið auka orku, en nýkringdu bikarmeistararnir virtust hreinlega hræddir í sóknarleik sínum á köflum.
„Það voru allir tilbúnir, vörnin barðist, barðist og barðist og það voru allir tilbúnir í þetta. Það er eins og það henti okkur vel að mæta þeim. Við lemjum á þeim og það gefur okkur auka orku að sjá þær detta í gólfið."
Haukar mæta toppliði Vals í næstu síðustu umferðinni og svo tekur við viðureign við ÍBV, Hauka eða Val í úrslitakeppninni.
„Við erum að fara inn í síðasta leikinn til að vinna. Við þurfum að halda áfram að spila svona og verður erfitt fyrir öll lið að mæta okkur," sagði Berta að lokum.