Óðinn Þór Ríkharðsson átti mjög góðan leik í 31:31-jafntefli Kadetten gegn Suhr Aarau í svissnesku A-deildinni í handbolta í kvöld.
Óðinn skoraði 8 mörk fyrir Kadetten en eitt af þeim var jöfnunarmark liðsins af vítalínunni eftir að leiktíminn var runninn út. Aðalsteinn Eyjólfsson þjálfar lið Kadetten.
Óðinn hefur verið í góðu formi með Kadetten undanfarið en hann var ekkert með í upphafi leiktíðar vegna meiðsla sem hann var að jafna sig á. Líklegt verður að teljast að hann verði í lokahóp íslenska landsliðsins fyrir HM í janúar á næsta ári.
Kadetten er í öðru sæti deildarinnar með 28 stig, tveimur stigum á eftir toppliði Kriens sem á þó leik til góða.